P&E Minister chuan kawlphethaa intodelh tura hmalakna kawngah P&E Dept officerte chu ram hmangaihna leh siamthat duhna thinlung pu chunga hnathawk turin a chah a, "Tunhnaia Mizoram Sorkar in kawlphetha leina man ba cheng vaibelchhe 81 lai mai a pek avangin Mizoram Sorkar chungah lawmthu Ka sawi bawk a ni," a ti.

"Tunlaiin thli leh ruah avanga kawlphetha pekchhuah kawnga mipuiten harsatna an tawk chu pawi ka ti hle a, kawlphetha hnianghnar a mipuite pek anih theih nan theihtawp P&E in a chhuah zel dawn a ni", a ti bawk. Aizawl khawpui bikah kawlphetha tha zawka mipuite hnena pekna tur hnathawh mek, RDSS leh Smart City Project thawh mek chu hmun thuma then hmunkhat thawh zawh tawh a ni a. Hmasawnna hnathawh avangin power shutdown lak zauh zauh a la ngai rih dawn a, mipuite lo hrethiam turin Minister chuan a ngen nghal bawk a ni.

He meetingah hian transformer chhia avanga kawlphetha pek kawnga harsatna awm mekte chinfel nan State budget a transformer thar leina tur pawisa dah hmangin transformer thar te company atanga direct a man tlawm zawka lei dan tur ruahmanna te thlirho a ni bawk.

Mizoram hmun hrang hranga power supply chungchanga harsatna awmte report zung zungna tur Customer Care Centre(CCC) chu Nikhat a darkar 24 function tura tuai thar leh nghal ni se. SE level officer pakhatin a bik taka vil tura rel a ni. He Customer Care Centre(CCC) kaltlang hian ramchhung khawi lai atang pawhin power supply chungchang harsatna thlen theih a ni anga, duty ten a changtu Division/sub-division te hnenah an bawhzui turin an hriattir vat thin dawn a ni.

He meeting-ah hian hydel project hrang hrangte tuaithar dan tur leh power tam zawk siam chhuak thei turin ruahmanna hrang hrang siam a ni bawk.

Mizoram hmun hrang hranga kawlphetha pekchhuahna ruhrel siam mekte thlirho nghal niin, heng hnathawh mek thenkhata harsatna awmte sawiho niin chinfel dan tur ruahmanna siam nghal a ni.

Meetingah hian P &E Minister bakah Superintending Engineer chin chunglam an tel a ni.